CAGAYAN DE ORO CITY – Gikontra ni Gusa Brgy Kap Marlo Tabac ang pasiatab sa iyang president sa ABC nga si incoming City Councilor Alam Lim nga daghan na sa mga kapitanes sa syudad ang nawad-an sa pagsalig kaniya.
Miingon si Tabac nga dako kining sukwahi kung himulsuhan ang tinud-anay nga pagbati ug baruganan sa ilang mga kaubang kapitanes itandi sa gipamugos sa grupo ni Alam.
Siya miingon nga gipasigarbo sa pikas grupo nga 64 ka kapitanes ang namirma nga ipalagpot kini sa puwesto apan ang tinud-anay wala makakuha sa 2/3 votes kay dunay nakasabot ug wala moduyog sa maong lakang.
Gihinaut niini nga sa oras nga molingkod na kini,mas magbaton pa sa maayong relasyon ang mga kapitanes sa dakbayan.
Samtang gihangyo ni outgoing 1st District City Councilor George Goking ang mga kritiko ug mga alyado ni City Mayor Rolando ‘Klarex’ Uy nga mag-move on sa bangi sa politika sa dakbayan.
Kini tungod kay mas daghan pa nga mga importanteng butang nga angay hataga’g prioridad kaysa ang kagubot lang gihapon sa politika ang usikan sa panahon.
Siya miingon nga unta ang mosunod nga molangkob sa 21st city council ang makamao sa paghatag pagtagad sa mga bug-at ug mga prayoridad nga isyu alang sa ikaayo sa dakbayan.
Partikular nga gitumbok niini ang nga angay buhaton sa syudad epekto sa ekonomiya gumikan sa panaggubat sa Israel ug Iran didto sa Middle East.
