CAGAYAN DE ORO CITY – Kasuhan sa attempted homicide ug illegal possession of firearms ang suspek pagpamusil nga kanhi usab nalambigit sa pagbaligya’g ilegal nga droga sa piskalya sa Iligan City.
Miingon si Police Regional Office 10 spokesperson Joann Navarro nga giila ang dinakpan nga si alyas Kano,35 sanyos kinsa paspas nasignit sa naglangkob sa Motorized Anti-Street Crime Operatives nga naila usab nga ‘Pulis de Motor’ kay giingong namusil sa gikalantugi niini nga sila alyas JP ug alyas Sam sa Brgy Poblacion.
Matud ni Navarro nga unang nagkabikil ang suspek ug ang usa sa mga biktima tungod sa lalis sa patakarang-trapiko nga nag-resulta sa pagpamusil gamit ang kalibre 38 nga armas.
Apan kay mikagar man ang armas ni Kano hinungdang wala niya maigo si Sam taliwala nga nakapabuto kini’g katulo.
Apan napagan ang laing sibilyan nga si alyas Dena kinsa trabahante diin siya naigo sa wala nga abaga gikan sa pagpamusil sa suspek.
Hinoon,luwas ra ang biktima nga nahatagan sa medikasyon sa Don Gregorio Memorial Hospital sa Iligan City.
Gilayong gigukod sa Pulis de Motor ang misibat nga suspek hangtod nga nalukong ug nadakpan.
Dugtong niini,gitimbaya ni Police Regional Office 10 Director Brig Gen Rolindo Suguilon ang paspas nga pag-aksyon sa mga pulis sa Iligan City kabahin sa hitabo.
Gipanganti sa heneral nga walay ihatag nga pagpaluag sa seguridad aron mahatagan sa igong proteksyon ang mga sibilyan batok sa pipila ka dautang personalidad sa palibot.
