Nagsubo ang showbis industry human paspas nga mikatap ang report nga namatay na si Lolit Solis. Si Solis, kinsa 78 anyos, naila isip usa sa mga haligi sa entertainment journalism sa Pilipinas.
Ang impormasyon sa iyang pagtaliwan unang gipahibalo pinaagi sa emosyonal nga post ni actor Niño Muhlach, kinsa usa sa mga gi-atiman ni Manay Lolit, nga miingon: “Paalam Nanay Lolit Solis.”
Gamit ang iyang screen name nga Manay Lolit, siya naila sa iyang mga kontrobersyal nga chika sa lokal nga industriya sa showbis, lakip na ang iyang walay lipud-pipud nga komentaryo, ug pagka-ina-inahan sa daghang mga artista.
Sulod sa daghang dekada, siya usa ka pundasyon sa showbiz media kay nagsilbi kining talent manager, talk show host, ug kolumnista nga walay makatupong sa iyang impluwensiya.
Sa pagkakaron, wala pa ipagawas ang opisyal nga detalye sa hinungdan sa iyang pagpanaw ug sa plano sa haya.
Dugtong niini, gikompirmar usab ni actor-turned politician Jolo Revilla ang pagkamatay ni Solis.
