CAGAYAN DE ORO CITY – Hait ang mga pulong gibuhian ni Misamis Oriental Governor Juliette Uy sa pagtambong niya sa flag raising sa kapitolyo-probinsyal kaganihang buntag.
Kini human hagita ni Uy ang mga empleyado sa kapitolyo nga alkontra sa iyang pamunuan kay pabiling naggapos sa kanhi administrasyon nga moluwat sa katungdanan.
Partikular gitumbok sa gobernadora usa ka empleyado nga si EF Faelnar kinsa mibatikos kaniya kabahin sa unang pahayag niini sa legalisasyon sa illegal mining activities sa lungsod sa Opol ning lalawigan.
Namahayag si Uy nga angayang mag-pokus sa trabaho si Faelnar kay sige paghinaway kaniya gamit ang social media kay sayod kini sa iyang pagkatawo ug pamilya niini.
Gisampit sa opisyal ang giingong illegal mining operations sa probinsya nga tinugutan sa kanhi Gobernador Peter Unabia ingon man kaubanan aron pagkutkot sa mga bulawan.
Nalakbitan usab ang pangalan ni Bebing Dumadag nga nagtrabaho sa buhatan ni Unabia kaniadto ug makaduhang higayon nakig-kontra pagka-mayor sa anak ug kapikas sa gobenadora.
Miingon si Uy nga angayang magbaton sa delikadisa kay nasuta sa pasiuang pag-audit nga naghinbora ang ‘cash advances’ nga pakyas pa mahatagan sa ‘liquidation.’
Samtang sa pikas bahin, may social media post si Faelnar nga nagsulti nga dili angayang panason ni Uy ang pahayag niini nga makita ug mbasa sa facebook.
Kini tungod kay mohimo usab siya sa aksyon kabahin sa nahimong unod niini.
Una nang ikalipay ni Uy nga mang-resign ang mga empleyado nga walay kooperasyon sa kapitolyo kaysa magpadayon pagtrabaho nga walay klaro nga nahatag nga serbisyo.
