Kanunay peligro sa katawhan ang pagsugal.
Kini ang mensahe ni Bishop of Iligan, Most Rev. Jose Ramirez Rapadas III, mahitungod sa pagkuyanap sa online-sugal.
Nabalaka si Rapadas sa dakung epekto sa sugal sa mga katan-unan kay nagkabata ang gagamit sa cellphone ug nagkabata ang gadula sa online nga pasugalan.
Gumikan sa adiksyon sa sugal, gikonsiderar ni Rapadas ang online ug onsite gambling isip pinaka bag-ong bayrus sa katilingban, kay nakahatag kinig kadaut sa utok, paghubas sa salapi, pagkabungkag sa mga pamilya, ug ang pinaka grabe mao ang pagmugna sa dakung kremin.
Gipakasama sa obispo ang online sugal isip sakit sa tawo nga kinahanglan matambalan pinaagi sa pagduol sa mga sikologo o mental health experts.
Una niini, gikasubo ni Bishop Rapadas ang nagsaka nga ihap sa dautang apekto sa pag-abusar sa internet ug social media.
