CAGAYAN DE ORO CITY – Gikalampag sa grupo sa mga negosyante si Pres Bongbong Marcos pinaagi sa usa ka pag-awhag nga pun-an pa ang kasamtangang packages nga gitanyag sa Philhealth ngadto sa mga miembro ug mga tawo nga madala sa opsital nga pribado sa nasud.
Kini sa tuyo nga maubsan ang pagdasok sa mga pasyente nga mangabot sa public hospitals kay anaa man ang zero billing.
Gibutyag ni Ray Talimio Jr,kanhi chairman sa MSMEs Misamis Oriental-Cagayan de Oro Devt Council nga mas maayo kini nga mahitabo aron matubag ang tinud-anay nga panginahanglan sa panglawas sa katawhan.
Siya miingon nga dili igo nga kutob lang sa pag-ingon nga gipalig-on ang mga programa nga dala sa Philhealth apan kulang packages sanglit kulang ang gipondo nga gi-alokar sa nasudnong gobierno sa maong ahensiya ning tuiga.
Gani,angayang magpakita na si Marcos sa klarong agi sa iyang pagdumala sa nasud.
Kini tungod kay wala pa’y nakit-an ang katawhan nga tinud-anay nga legasiya ni Marcos.
Siya miingon nga gipatuman sa administrasyon ang Build Better More/BBM gikan sa ideya nga Build,Build,Build nga ideya sa kanhi Duterte administration apan walay gika-presentar si Marcos.
Milaum kini nga kung matinood ang huhungihong nga motukod sa World Trade Center si Marcos nga maka-akomodar sa 500-mil ka tawo,kini makasugakod na sa ubang kanasuran nga naghupot usab sa dagkong mga imprastraktura.
Hinoon,gradong siete ang gihatag ni Talimio sa trabaho ni Marcos ilabina nga maayo ang diskarte sa iyang economic team diin pabiling ubos ang inflation rate sa mga batakang palalito sa nasud.
