CAGAYAN DE ORO CITY – Gihan-ay na ang mga kasong kriminal nga ipasaka batok sa unom ka lalaki nga nabawian sa 75 ka sako sa ‘ore minerals’ nga gibana-banang minilyong salapi ang kantidad dihang naharang sa mga operatiba sa PNP-Criminal Investigation and Detection Group – Misamis Oriental sa Purok 3,Brgy Mahayahay,Manticao ning lalawigan.
Kini human nag-positibo ang gikasa nga operasyon sa tropa ni CIDG-MisOr commander Police Major Frey Emocling kabahin sa impormasyon sa presensiya sa mga dinakpan sukad pa sa milabay’ng semana.
Gipang-ila ang mga dinakpan subay sa resulta sa imbestigasyon sa CIDG-MisOr nga sila Ronnie Fernandez,41 anyos,taga-Davao de Oro, driver sa naharang nga sakyanan;Reggie Maquidato,34 anyos nga taga-Brgy Tuod,Manticao,Misamis Oriental; Benito Lamsin Jr,43 anyos; Jodel Cabug,37 anyos;Arnold Tagaytayan,47 anyos nga pulos taga-Tagum City ug Elfred Carido,36 anyos nga taga-Davao de Oro.
Saysay ni Emocling nga gilayong gidala ang mga dinakpan sa ilang buhatan aron ipaubos sa imbestigasyon nasaysay nila nga igo lang sila gisugo sa pagpabiyahe sa kontrabando.
Gawas sa mining minerals nga nakompiskar nga gisakay sa dump truck,nabawi usab kang Fernandez ug Lamsin ang gitoohang paltik nga kalibre 45 nga armas kuyog ang mga bala.
Nakompiskar usab ang mga cellphone diin gipaubos sa forensic examinations aron masuta kung kinsa ang mga nagsugo sa mga dinakpan.
Apil sa nabawi gikan sa mga dinakpan ang pipila ka salaping cash ug gamay’ng bibliya.
Detinado ang mga dinakpan sa mini-cell sa CIDG-MisOr ug gitakdang kasuhan sa illegal possession of firearms with ammunitions ug pagsupak sa Philippine Mining Act of 1995 sa piskalya sa syudad sunod semana.
Dumduman nga sa miaging Hulyo 23, nasakote usab sa laing unit sa PNP particular sa Police Maritime-Misamis Oriental ang pito ka Chinese nationals nga nag-operate sa illegal mining site sa Brgy Tuburan ning syudad diin sila detinado na sa Lumbia City Jail.
