Nakamata na, gikan sa tolo ka adlaw nga katulugon ang Grade 3 student nga si Jonard Ensipido, kasamtangang nagtungha sa Maria Cristina Falls Elementary School sa Iligan City. Segun sa report, anaa pa gihapon sulod sa Intensive Care Unit ang bata human sa brutal nga pagpangulata sa dili mominos lima ka mga senior highschool students sa maong lugar. Gikondinar sa taas nga lebel ni Iligan City Mayor Freddie Siao ang panghitabo ug mipasabot nga motabang sa pamilya ni Jonard samtang nagpadayon ang imbestigasyon. Wala pa’y opisyal nga pamahayag ang tunghaan nga nalambigit sa insidente, ni ang DepEd Region 10.
Subay sa balaod, ilalom sa Republic Act No. 10627 o Anti-Bullying Act of 2013, gikinahanglan nga ang tanang eskwelahan magpatuman sa klaro nga polisiya batok sa bullying. Ang Department of Education (DepEd) naglatid sa mga lakang aron maprotektahan ang mga estudyante, lakip na ang pagmugna sa Child Protection Committees dungan sa pag-instolar sa Learner Formation Officers nga motubag dayon sa mga reklamo. Lakip sa porma sa bullying ang physical, verbal, ug emotional abuse. Ang pinaka grabe mao ang cyberbullying ug social exclusion nga muhatag sa dakung kaulawon sa usa ka magtutungha nga adunay lapad nga “audience” gamit ang social media. Ang mga eskwelahan obligadong motubag sa sulod sa 24 oras sa tanang reklamo ug maghatag sa report sa DepEd kada insidente.
Ang komunidad adunay dakong papel sa pagpakigbatok sa bullying. Ang mga ginikanan, silingan, ug lokal nga opisyal mahimong moapil sa school forums, magreport dayon sa mga insidente, ug mupakatag sa edukasyon bahin sa respeto ug mental health. Ang pagtabang sa mga biktima pinaagi sa psychosocial support ug legal assistance usa ka konkretong lakang aron mapakita nga ang komunidad dili mopasaylo sa kalikuan. Ang panaghiusa sa pamilya, eskwelahan, ug komunidad mao ang yawe aron mapugngan ang susamang trahedya ug maprotektahan ang kabatan-onan.
