CAGAYAN DE ORO CITY – Walay makasuha’g kriminal sa subo nga gidangatan sa magsoong mag-uuma nga mihimo’g pagpamulawan o ‘treasure hunting’ sa Sitio Sawiki,Brgy Patpat,Malitbog,Bukidnon.
Kini ang pagsaysay sa Bombo Radyo ni Police Regional Office 10 spokesperson Major Joann Navarro taliwala sa subo nga kamatayon sa magsoong Guillermo Ladrada,41 anyos ug Jesus Ladrada,53 anyos nga pulos angpuyo sa lugar.
Siya miingon nga subay sa imbestigasyon sa Malitbog Municipal Police Station nga hilom nga namulawan ang tulo ka magsoon nga naglakip kang Romulo Ladrada,49 anyos sa dihang kalit mihunlak ang yuta padulong sa ilang lokasyon rason nga natabunan ang mga biktima.
Apan nakalinggawas sa maong hitabo si Romulo ug kini ang nakataho sa kapolisan kabahin sa ilang gidangatan.
Gilayong naghiusa ang tropa sa kapolisan ingon man ang rescuers gikan sa Malitbog Municipal Disaster Risk Reduction Office ug Bureau of Fire Protection aron pangluwason ang mga biktima.
Mikaon pa sa pila ka oras ang paghaw-as sa magsoong Jesus ug Guillermo ayha sila nadala sa provincial hospital sa lungsod apan pulos na wala na’y kinabuhi.
Nagpasidaan si Navarro nga dili basta-basta nga molambigit sa maong kalihukan kung wala itugot sa balaod,kulang sa kahibalo ug dako ang peligro sa sudlon nga binuhatan.
