Mikatag karon sa social media ang pastoral letter gikan sa arkidiyosos sa Ozamis ug pirmado ni Archbishop Martin Sarmiento Jumoad, D.D. Pagbadlong sa mga pari sa Society of Saint Pius X (SSPX), ilabi na sa St. Michael Parish sa Tangub City ang unod sa sulat.
Mipasidaan ang arsobispo sa kalihukan sa grupo ilabe nga wala giila nga lehitimo ang ilang pagselebrar sa Santos nga Misa.
Gibutyag ni Bishop Jumoad nga ang canonical status sa SSPX nagpabiling “irregular” tungod sa mga isyu nga wala pa masulbad sukad sa Ikaduhang Vatican Council.
Iyang gitin-aw nga ang Eukaristiya, isip kinauyokan sa Kristohanong kinabuhi, kinahanglan ipahigayon uban sa husto nga otorisasyon ug panaghiusa sa Simbahang Katolika.
Gitataw ni Jumoad nga ang misa SSPX walay pagtugot sa diyosesis ug giisip nga illegitimate ug dili opisyal nga buhat sa Simbahan.
Nanawagan ang arkidayosis sa tanan mamimbahay nga dili mu-apil sa maong misa aron malikayan ang kalibog sa panaghiusa sa Simbahan ug sa mga sakramento.
Gi-awhag usab ang mga tumutuo nga mangayo sa sakramento lamang gikan sa mga pari nga naa sa tibuok panaghiusa sa Santo Papa ug sa lokal nga Obispo.
Giingon ni Archbishop Jumoad nga ang mga gustong motambong sa tradisyonal nga liturhiya pwede gihapon moapil sa Extraordinary Form of the Mass, basta kini ipahigayon uban sa husto nga otorisasyon ug pagtahod sa lokal nga obispo.
Gitapos sa sulat ang panawagan alang sa panaghiusa ug pagkahiusa sa pagtuo, uban sa pagpahinumdom nga magpabilin nga lig-on ang panaghiusa sa Santo Papa ug sa lokal nga Simbahan.
