Sa budget hearing sa DPWH sa Kamarabaha, gipahungaw ni Davao City Representative Isidro Ungab ang pagtumaw sa gitawag niyang “Chop-Chop Gang” o grupo kuno nga responsable sa pagpangputol-putol sa mga dagkong proyekto nga pondohan unta sa Official Development Assistance (ODA), sama sa Metro Manila Flood Control Project ug Pasig-Marikina River Channel Improvement. Miingin si Ungab nga ang pondo sa mga maong proyekto nga bilyon-bilyon ang kantidad, kalit nga nawala ug gi-apod-apod ngadto sa daghang gagmay nga proyekto, nga posibleng makadaot sa kredibilidad sa nasod tali sa mga foreign donors, nga unta makapugong sa long-term nga solusyon sa pagbaha. Wala siyay gitumbok nga ngalan, apan ang iyang pahayag nakapasiga sa mata sa katawhan ilabe na sa isyu sa transparensiya ug accountability sa budget process. Usa sa iyang gipangutana si resigned DPWH Sec. Manuel Bonoan kay nahitabo man kini sa panahon nga siya pa ang naghawid sa ahensya.
Subay sa balaod ODA o Official Development Assistance mao ang pondo nga gihatag sa mga langyaw nga gobyerno o internasyonal nga organisasyon aron suportahan ang kalamboan sa ekonomiya ug katilingban sa usa ka nasod. Ang foreign funded projects gitumong sa pagpugong sa baha, sama sa mga drainage system, flood control structures, ug river improvement sa Pilipinas. Ang ODA dako’g tabang aron malikayan ang kadaot sa kabtangan ug kinabuhi panahon sa kusog nga ulan o bagyo. Kini nga mga proyekto kasagarang gipasiugdahan sa pakigtambayayong sa lokal nga gobyerno ug mga foreign donor, nga nagtinguha nga mapalambo ang kahimtang sa katawhan sa mga lugar nga sagad bahaon. Ang ODA mao ang nakalatid sa ODA Act of 1996 (Republic Act No. 8182)
