Nagpahigayon sa coordination meeting ang tanang mga barangay kapitan sa syudad ubos sa pagpangulo ni Kapitan Marlo Tabac, ABC President, aron mutabang sa pagsulbad sa kasamtangang problema sa pagkolekta sa basura.
Sumala ni Tabac, gihangyo siya ni City Mayor Rolando Uy, isip “amahan” sa mga kapitan, nga pakusgon ang suporta sa mga barangay alang sa bag-ong kontratista sa garbage collection service sa syudad.
Gibutyag ni Tabac nga usa sa ilang konkretong lakang mao ang paglimpyo sa mga dalan nga adunay mga “obstruction” aron makasulod sa mga trak sa basura sa ilang pick-up points.
Gihangyo sa opisyal ang mga taga-barangay nga mupatuman sa ordinansa nga magbadlong sa mga car owners nga hiposon ang ilang mga sakyanan, ilabe kung schedule sa tinghakot sa basura.
Naghinaot si Tabac nga masabtan sa katawhan ang kahinungdanon sa disiplina sa pagmentinar sa kalimpyo sa matag tugkaran sa puy-anan, sa matag dalan sa barangay, ug sa national highways. (Bombo James Oliver)
