CAGAYAN DE ORO CITY – Gi-relib ni City Mayor Rolando ‘Klarex’ Uy si Engr Armen Cuenca isip manager sa City Local Environment and Natural Resources Office/CLENRO sa dakbayan epektibo kagahapong adlawa.
Kini human pangunayi sa mayor ang pagpangulo pagsulbad sa dugay nang suliran sa basura nga nakahatag sa negatibong imahen sa syudad.
Gipuli ni Uy sa gibakante nga puwesto ni Cuenca ang iyang assistant manager nga si Elvisa ‘Bing’ Mabilin aron mapadayon ang pagsulbad sa mga basura sa dakbayan.
Nasuta sa mayor nga adunay mga isyu kabahin sa pagdumala sa basura nga wala siya kini masayod kay limitado ang impormasyon nga nakaabot kaniya.
Kini naglakip sa kasamtangang isyu nga ang dalan padulong sa engineered sanitary landfill nga nakabase sa Brgy Pagalungan ang dili halos maagian kung mag-ulan kay mangalubong ang mga ligid sa garbage trucks gikan sa city proper.
Sa pagkutlo ning balita, wala pa’y gilugwa nga komento si Cuenca kabahin sa lakang sa mayor.
Hisayrang sa flag raising sa city hall kagahapon sa buntag,namulong ang mayor nga adunay ipatuman nga kabag-uhan sulod sa CLENRO ug nagtoo ang kadaghanan nga kining pagpuli ni Mabilin kang Cuenca ang kabahin niini.
