Ilubong na ang tolo ka miyembro sa pamilya nga napaig-patay sa pagkasunog sa ilang puy-anan sa Block 10, Lot 32, Phase 2, Mega Heights Subdivision, Brgy. Gusa.
Gikumpirmar ni Brgy Gusa Kapitan Marlo Tabac nga ang Barangay LGU, ug CSWD na ang mi-atiman sa mga paghatag sa katapusang pahulayan sa mga biktima ug gitakda kining ilubong ang ilang mga abo, karong buntag sa City Cemetery sa Bolonsori, Brgy Camanan-an ning syudad.
Una niini, gikompirmar sa anak-lalaki, sa unang pamilya sa biktima, nga walay kutay sa kuryente kundiin, solar light, lampara ug debaterya nga suga lamang ang gamit sa pamilya, sulod sa balay sa iyang amahan.
Dugtong niini, gibutyag usab sa anak sa biktima nga gapangandado sa ilang gate matag adlaw ang iyang senior citizen nga amahan tungod sa kahadlok sa mga dautang elemento.
Subay sa impormasyon nga nahipos sa Bombo News Team, ang namatay nga si ginang Annie Rose Talara, 36 anyos, dugay nang trabahante sa ORO BAYANIHAN, samtang ang iyang kapikas ilado nga sastre. Ang ilang anyos nga anak, usa ka highschool student sa pampublikong tunghaan ning syudad.
Hisayran nga hangtud karon nagpabiling misteryo kung unsa ang hinungdan sa pagkasunog sa puy-anan sa Pamilya Talara.
