Walay pagduha-duha nga gibutyag ni kanhi senador Antonio Trillanes IV nga si Senador Bong Go ang ultimate plunderer sa patung-patong nga kaso nga iyang gisang-at sa tolo ka personahe.
Sa miaging adlaw, mibisita si Trillanes sa Office of the Ombudsman aron isang-at ang kaso batok kang kanhi Presidente Rodrigo Duterte ug Senador Go sa Department of Justice ug sa Office of the Ombudsman.
Ang mga kaso naglakip sa plunder, graft, culpable violation of the Constitution, ug betrayal of public trust.
Giakusahan ang duruha ni Trillanes sa pag-award sa kapin 7 bilyon pesos nga nga mga proyekto sa imprastruktura ngadto sa CLTG Builders ug Alfrego Builders, nga gipanag-iya sa amahan ug igsoon ni Bong Go.
Namugos ang kanhi senador nga ang mga kontrata nagsugod pa sa panahon ni Duterte isip mayor sa Davao hangtod sa iyang pagka-presidente.
Hisayran nga human sa pagsang-at ni Trillanes sa kaso, gilayong miresbak ang senador ug miingon nga wala sa ilang kaliwat ang kawatan, ug namugos nga siya naghupot sa delicadeza.
