Gimando sa Malacañang ang mas lawom nga monitoring sa mitumaw nga impormasyon nga posibleng gipundohan sa mga langyaw ang mga lihok-protesta nga gipahigayon sa EDSA, lakip na ang Iglesia Ni Cristo Rally for Peace. Gibutyag ni Palace Press Officer Undersecretary Claire Castro nga gimonitor na sa Armed Forces of the Philippines (AFP) ang kalihukan sa grupo aron masuta kung adunay panagsabot tali sa mga langyaw ug sa mga Pilipinong organizers. Miingon si Castro nga nagtinabangay ang AFP ug Philippine National Police (PNP) sa pag-ila kung foreign-funded ba ang mga kalihukan, ilabi na kung kini nagtinguha sa destabilisasyon sa gobyerno. Kung mapamatud-an nga misawsaw na ang langyaw’ng gahum sa internal nga mga isyu sa nasud, dili magduha-duha ang gobyerno sa pagsak’g kaso sa pagtraydor batok sa mga indibidwal nga nalambigit.
