CAGAYAN DE ORO CITY – Init ang hisgutanan sa halos 65 milyones pesos nga mega health center sa regular session ning syudad kagahapong adlawa.
Kini human gihimua’g special report ni Kag Imee Moreno kung unsay tinud-anay nga nahitabo nga wala pa mahuman ang maong pasilidad nga sobra duha ka tuig nang nagbarog sa Sitio Macanhan,Brgy Carmen ning syudad.
Miingon si Moreno nga angayang masayran sa katawhan ang tinu-danay nga kahimtang sa proyekto ilabina nga dakong pondo sa salapi ang gigamit alang niini apan pabiling mga poste lang nagbarog hangtod ning adlawa.
Dumduman nga unang namulong ang city govt nga gibiyaan ang proyekto apan mitingog usab ang kontraktor nga gisuspenso nila ang trabaho kay pakyas makabayad ang city hall kanila.
Samtang wala namasangil apan gusto lang sa minoriya nga mahataga’g katin-awan kung nganong wala pa matibawas ang mega health center nga gitukod sa city govt ning syudad.
Kini ang depensa ni Konsehala Yvy Emano kung nganong gikuti-kuti nila ang maong proyekto sa pagsiguro nga masuta kung anaa pa ba ang pondo nga gi-alokar alang niini.
Siya miingon nga dili dautan ang pag-utingkay sa isyu kay kung adunay angay manubag,kinahanglan nga pahamtangan sa kaso.
Hisayrang halos 70-milyones pesos ang gi-alokar nga pondo sa proyekto sa panahon nga kini gipangayuan pagtugot sa konseho sa miagng katuigan.
