Gikondenar sa Alliance of Concerned Teachers (ACT) Northern Mindanao ang kasamtangang sistema sa hustisya sa nasud. Gibutyag ni Roland Cruz, miyembro sa ACT Partylist, nga mapahimuslanon ang mga adunahan ug opisyal sa gobyerno tungod kay lisud sila mapriso. Gigamit nila ang ilang kwarta aron makalikay sa presohan, samtang ang mga kabus, bisan pa nga gi-akusahan pa lang, gilayon nang ipriso. Gitandi ni Cruz ang nahitabo sa DPWH flood control scandal, diin adunay 17 ka indibidwal nga napalugwaan sa warrant of arrest ug 7 lang ang gilayon nga nadakpan. Gikuwestiyon sa grupo nganong dili madakpan ang mga tag-as nga opisyal ug igo lang muingon ang arresting officer nga “wala dawata” o “wala sa puy-anan” ang tawong adunay arrest order. Nagtoo si Cruz, nga kung lig-on ug patas ang justice system sa Pilipinas, dili kini mamili sa ipatuman nga imbestigasyon. Kinahanglan managsama ang pag-atiman sa kaso sa kabus ug sa adunahan aron masaligan ug respetohon sa katawhan ang hustisya sa nasud.
