Pahugtan pa sa Land Transportation Office (LTO) Regional Office -10 ang ilang pagbantay sa mga salakyan panahon sa Pasko hangtud sa pagsugat sa Bag-ong Tuig. Gi-anunsyo ni LTO-10 Public Information Officer Nanding Flores, sa BOMBO RADYO, ang paglusad sa ilang ahensya sa Oplan Biyaheng Ayos sa Pasko. Kini nga operasyon sugdan sa Disyembre 20, ug mulungtad hangtud Enero 4 sa sunod tuig. Tumong nini nga masigurong luwas ug hapsay ang biyahe sa mga pasahero sa peak season. Lakip sa ilang aktibidad ang roadside ug terminal inspections sa public utility vehicles (PUVs) aron masiguro nga roadworthy ug lig-on ang sakyanan. Ila usab imonitor ang dagan sa mga sakyanan nga gikan sa airport, seaport, ug bus terminals tungod sa daghang pasahero. Ang Oplas Biyaheng Ayos sa Pasko, ipatuman pinaagi sa hugot nga koordinasyon sa Philippine Coast Guard (PCG), Philippine Ports Authority (PPA), ug Maritime Industry Authority (MARINA) alang sa seguridad sa dagat.
