Mas niubos ang total confidential ug intelligence fund sa gobyerno para sa Fiscal Year 2026, nga mokabat og ₱11.8 bilyon. Kini mas ubos kumpara sa ₱12.12 bilyon sa 2025, o mas ubos sa ₱302 milyon. Sumala sa Department of Budget and Management (DBM), gisunod sa Malacañang ang naglungtad nga mga palisiya aron masiguro ang responsibilidad ug klarong paggamit sa maong pondo. Anaa sa joint circular sa DBM ug Commission on Audit (COA) ang mga giya sa accounting niini. Kinahanglan usab nga ang Office of the President magsumite og report sa Kongreso aron masubay ang paggamit sa pondo ug masiguro nga husto ug responsable ang paggasto sa nasudong budget.
