CAGAYAN DE ORO CITY- Natingkagol na’g balik ang unom ka person under police custody nga unang mi-eskapo pinaagi sa paggabas sa selda sa Puerto Police Station 6 sa Brgy Puerto ning syudad.
Kini human sunod-sunod nga nakuha’g balik sa hiniusang operasyon sa kapolisan ug force multipliers ang mga suspek sa magkalahi nga bahin sa dakbayan ug Bukidnon.
Gibutyag ni Capt Emilita Simon,tigpamaba sa Cagayan de Oro City Police Office nga pinakaulahi nga nadakpan nga nagtago sa kasagbutan sa Upper Puerto ang gitumbok nga lider nga si Roderick Fuentes ug Carl Vincent Gonzaga nga pulos taga-Brgy Bugo ning syudad.
Miingon si Simon nga mismo si Police Major Amanollah Bantuas kinsa na-relib isip kumander sa Puerto Police Station ang nangulo sa pagpangita sa mga eskapo hangtod nga kini nabalik sa kustodiya sa kagamhanan.
Una nang mitahan sa kapolisan pinaagi sa ilang mga kabanay sila Mark Anthony Gonzaga,Jay Emmanuel Salcedo samtang si Joshu Dicatoria ang nahulog sa pangpang rason nga nadakpan kagahapong adlawa.
Dumduman nga tungod sa pagka-eskapo sa mga dinakpan,napapha na hinoon sa pagka-kumander si Bantuas epektibo kagahapon sa buntag.
Hisayrang attempted rape ug pagpayuhot sa illegal nga droga ang giatubang sa mga kanhi eskapo.
