Gikalipay sa grupo sa mga negosyante sa Cagayan de Oro Chamber of Commerce and Industry Foundation Inc. ang pagtubag ni City Mayor Klarex Uy nga lugwayan ang katapusang adlaw sa pagbayad sa buwis sa syudad. Unang nanawagan kang Mayor Uy pinaagi sa BOMBO RADYO si Oro Chamber President Engr. Almarco Brito nga lugwayan ang dealine sa renewal sa business permits tungod sa kataas sa linya sa mga negosyante nga naglukat sa ilang bag-ong lisensya sa milabay’ng mga adlaw. Mapasalamaton si Brito kay na-aksyonan dayon kini sa mayor ug mipasalig nga ang ilang grupo wala sukad mipalta ug makanunayong nagsuporta sa kampanya sa syudad batok tax evasion. Miingon si Brito nga dakong tabang ang gamay nga extension kay sayud sila nga ang syudad matag tuig nagsaka ang ihap sa mga invesment ug mga napatukod nga tindahan, busa, magkadaghan usab ang mag-renew ilabe na kanang dool sa deadline kay ang uban, apektado pa sa christmas break ug ayha pa naghikay tungod sa sunud-sunod nga bayrunon sa naglabay nga holiday season.
