CAGAYAN DE ORO CITY – Giklaro ni City Health Office officer-in-charge Dra. Claire Paglinawan nga walay igong basehan ang mikatap nga impormasyon nga adunay napulo ka tawo nga namatay gumikan sa impeksyon sa leptospirosis sulod sa mercado Cogon ning syudad sa miaging semana.
Kini ang katin-awan ni Paglinawan kuyog sila ni health committee chairman Kagawad Dr Paolo Gaane,City Economic Enterprises Business Development Administration (CEEBDA) Manager Atty. Marianne Ragas ug City Information Office head Jade Adecer sa gipatawag nga media conference bag-uhay lamang.
Namahayag si Paglinawan nga gilayon sila mihimo’g pakisusi epekto sa special report ni Gaane sa miaging regular session sa konseho aron masuta kung kinsa ang tinubdan sa impormasyon ug tinud-anay ang kasayuran.
Apan sa ilang nahipos nga impormasyon,negatibo nga napulo ka tawo ang namatay sa maong sakit nga unang nabaniug nga gikan sulod sa Cogon public market ning syudad.
Hinoon,giangkon sa city government nga adunay market vendor nga namatay apan dili ma-konektar sa leptos ang rason.
Una niini,mismo si City Mayor Rolando Klarex Uy ang mihimo sa pagpatawag kang Paglinawan ug Ragas aron mahatagan kini’g katin-awan sa mikatag nga impormasyon rason gihimo ang subsob nga imbestigasyon.
