Gipanawagan sa Ganda Natural Farming System Philippines Inc. ug uban pang environmental advocates ang mas lawom nga edukasyon sa katawhan kabahin sa kaimportante sa pagpanalipod sa kinaiyahan.
Sa interbyu sa Bombo Radyo, giingon ni Ganda Natural Farming System Philippines Inc. Founder Luz Antiza Denuyo nga kinahanglan masabtan sa katawhan ang ecological conversion aron motubo ang gugma ug respeto sa kinaiyahan.
Gipunting ni Denuyo nga dili problema ang development kon kini ecologically friendly ug walay dakong kadaot sa palibot.
Matod pa niya, daghan pang pamaagi aron malikayan ang pagdaghan sa plastic nga basura, sama sa paggamit sa mga dahon sa saging ug lubi isip basket ug sudlanan sa pagkaon, imbis nga styrofoam ug plastic containers nga makadaot sa kinaiyahan.
Nagtuo si Denuyo nga pinaagi niini dili lamang ang kinaiyahan ang matabangan, kundili lakip usab ang katawhan tungod sa dugang panginabuhian nga mahimong matun-an sa paggama sa maong mga alternatibo.
