Nagkasumpaki ug nag-kainitay sila Senador Alan Cayetano ug Senador Kiko Pangilinan tungod sa isyu sa West Philippine Sea (WPS).
Gisugyot ang usa ka resolusyon aron kondenahon ang Chinese Embassy sa ilang mga pamahayag nga giingong bastos batok sa mga opisyal sa Pilipinas.
Apan gi-insistir ni Senate Minority Leader Alan Peter Cayetano nga kinahanglan klarohon ug ilista ang partikular nga mga pamahayag nga bastos aron kini lang ang kondenahon, diin matod niya, dili man tanan nga gipagawas sa embahada kay binastos.
Dugang pa niya nga kauban siya sa pag-angkon nga panag-iya sa Pilipinas ang WPS apan nagpasidaan nga magmatngon sa resolusyon aron malikayan ang sobra nga interpretasyon.
Subay niini, mitubag si Senador Francis “Kiko” Pangilinan, ang author sa resolusyon, nga dili kinahanglan nga ilakip ang tanan nga pamahayag sa Chinese Embassy isip ‘annex’ sa dokumento. Matod pa niya, pinaagi lang sa simpleng pag-research, klaro na sa mga Pilipino kung giunsa sa embahada ang pagpagawas sa mga pamahayag nga mibastos sa pipila ka opisyal ug institusyon sa Pilipinas. (Phillip Ariata)
