Gi-kwenta ni African Union Commission Chair Mahamoud Ali Youssouf kung pila ang ilang nahatag nga epekto sa climate change sa tibuok kalibutan.
Sa iyang pamahayag sa African Union Summit 2026 sa Addis Ababa City, Ethiopia, iyang gipamugos nga 4% ra ang kontribusyon sa Africa sa greenhouse effect.
Kini ang hinungdan nga iyang gisingil ang mga dagkong nasud nga mu-abag sa Africa sa panahon nga sila maigo sa kusog nga bagyo o grabe nga hulaw, tungod kay gikan man sa maong mga nasud ang taas nga carbon emission ug dakong porsyento sa greenhouse effect.
Iyang gipamugos nga ang climate crisis usa ka global nga hagit nga walay gipili nga kontinente o komunidad.
Gumikan niini, iyang gipunting nga mas grabe ang epekto sa Africa diin ang biodiversity ug ekosistema nag-atubang sa peligro sa pagkahanaw.
Gitapos niya ang iyang pahayag pinaagi sa panawagan sa mga nasud nga grabe ang polusyon nga motabang sa Africa sa pagpalambo sa adaptation plans aron makasukol sa climate change.
Ang tabang, alang kaniya, dili lang taman sa pinansyal apan lakip ang teknikal nga suporta ug teknolohiya.
Giila usab sa AU ang kooperasyon sa United Nations ug uban pang internasyonal nga organisasyon isip lig-on nga partner sa pakigbatok sa ngilngig nga epekto sa climate crisis.
