NABALAKA si Romeo Aclo, program head sa Department of Education Cagayan de Oro Division, human siya mismo nakadawat og email phishing scam nga parehas sa nadawat sa pipila ka empleyado sa ilang buhatan.
Sumala ni Aclo, padayon ang dibisyon sa pagpahimangno sa tanang personnel nga magmatngon sa pagtuplok og mga kahina-hinalang links ug sa ubang pamaagi sa scammers nga tumong makakuha og sensitibong impormasyon ug posibleng pondo sa opisina.
Gipasabot niya nga ang phishing usa ka iligal nga paagi sa pag-access sa data bases, email systems, ug learning platforms nga mahimong mosangpot sa data breaches.
Matod pa niya, posibleng maapektuhan niini ang mga opisyal nga website ug portals sa DepEd kon dili malikayan ang maong pamaagi sa cybercrime.
Busa, nag-awhag ang DepEd CDO sa tanang empleyado nga likayan ang paghatag og personal ug opisyal nga impormasyon pinaagi sa dili beripikadong email ug mensahe online. (James Oliver)
