Gipasabot ni Atty. Samson So Tan, usa ka criminal law expert, nga aron maila isip kusog nga ebidensya ang mga gipresentar sa prosekusyon batok ni Kanhi Presidente Rodrigo Duterte kabahin sa iyang kampanya kontra droga, kinahanglan kining ma-verify ug ma-authenticate pag-ayo.
Sumala ni Tan, lakip sa mga gipakita sa prosekusyon ang giingong daghang namatay, ingon man ang mga public pronouncements ug mga video nga nagdawit kang Duterte isip mastermind sa giingong extrajudicial killings.
Apan matud pa niya, bisan pa og video o newspaper clippings ang ebidensya, kinahanglan gyud nga ma-establisar ang genuineness niini aron mahimong lig-on nga basihan sa kaso.
Gidugang ni Tan nga dili igo ang pagpakita lamang og video isip ebidensya, kondili kinahanglan susihon pag-ayo kung kinsa ang nagrekord, giunsa pagrekord, ug kung ang sulod ba niini nagpakita sa tinuod nga hitabo o dramatized lamang.
Gipatin-aw usab niya nga importante ang hustong pag-ila sa tinubdan ug ang pag-authenticate sa matag materyal nga isumite sa korte.
Busa, alang kaniya, ang tanang ebidensya nga ipresentar sa maong kaso kinahanglan maagian og hugot nga proseso sa verification aron masiguro ang kredibilidad niini. (James Oliver)
