Mihatag katin-awan si Vice President Sara Duterte kung nganong nagpasaka siya sa kasong perjury si Ramil Madriaga nga unang nagpaila nga kanhi personal aide ug bagman sa bise presidente.
Namahayag si VP Sara nga dili niya gusto mahitabo kaniya ang gibuhat ni kanhi Senador Antonio Trillanes IV sa iyang amahan nga napalagpot sa International Criminal Court (ICC) kay gipasagdan lang niya ang pagsaba-saba ni Trillanes.
Gumikan sa gihimong mga akusasyon ni Madriaga, gusto sa bise presidente nga maleksyon sa pagpamakak ang mga tawong nagdaut sa iyang kredibilidad.
Gipanghimakak ni VP Sara nga si Madriaga dili gyud niya aide, ug gilimod usab niya ang pasangil nga gisulayan niya kini ug suhol nga ₱1 milyon aron magpakahilom.
Iyang giingon nga binuhat-buhat lamang ang mga pamahayag ni Madriaga aron dauton ang iyang dungog.
Si Madriaga, nga kasamtangan nga nagapabilin sa prisohan, giila nga “alas” sa mga nagreklamo sa impeachment batok ni Duterte.
Apan bisan pa sa iyang affidavit, wala gihapon makapresentar ug lig-on nga ebidensya ang mga reklamante bahin sa giingong pag-abuso sa confidential ug intelligence funds sa Office of the Vice President ug sa panahon nga si Duterte pa ang kalihim sa Department of Education (DepEd).
