Nanawagan si Roland Cruz, sa grupong Alliance of Concerned Teachers (ACT) Northern Mindanao, sa Department of Education (DepEd) nga unahon ang tinuod nga problema sa edukasyon kaysa magsige og seminars, workshops, ug curriculum revisions.
Sumala kaniya, daghang classroom ang kulang, kulang ang magtutudlo, ug limitado ang learning materials, nga mao ang unang kinahanglan solusyonan aron mas epektibo ang pagkat-on sa mga estudyante.
Gipunting ni Cruz nga ang padayon nga pag-usab sa curriculum ug mga training sa mga principal ug heads dili makatabang kon dili masulbad ang pinaka-ugat nga problema sa edukasyon.
Ang ACT nanawag nga ang matag classroom dapat adunay 25–30 ka estudyante aron matagaan og insaktong pag-atiman ang matag bata.
Sa iyang pagtan-aw, ang pag-prioritize sa classroom infrastructure, mga magtutudlo, ug learning materials maoy pinakaepektibo nga lakang sa pagpaayo sa kalidad sa edukasyon sa rehiyon.
Gipunting usab niya nga samtang ang DepEd nagpadayon sa mga seminar ug curriculum review, mas importante nga masiguro nga sulbad ang mga basic needs sa eskwelahan aron dili mabalik-balik ang problema sa matag tuig.
