Misupak ug dili uyon ang mga labor consultant ug advocates sa Mindanao sa sugyot nga dili ipatuman ang ikaduhang tranche sa bag-ong wage order sa rehiyon tali sa giatubang nga krisis karon.
Matud ni Nick Borja, usa ka labor consultant, ilang gipanindigan nga kinahanglan gayud ipadayon ang implementasyon sa Wage Order No. 24 aron matuman ang gisaaran nga dugang sweldo alang sa mga mamumuo sa nagkalain-laing sektor.
Dugang pa ni Borja, mas maayo unta nga gi-implementar na ang dugang nga ₱14 nga usbaw sa sweldo sa mga trabahante kay hingpit kining gikinahanglan karong panahona.
Ang paglangan o paghunong sa implementasyon magpasabot lamang og dugang kabug-at sa kahimtang sa mga mamumuo nga nag-atubang na daan sa pagsaka sa presyo sa mga palaliton
.Gipasabot usab niya nga ang hustong implementasyon sa wage increase usa ka paagi aron maprotektahan ang katungod sa mga mamumuo ug mapreserbar ang patas nga pagtratar sa labor sector.
Busa, giawhag sa grupo ang mga employers nga ipadayon ang plano sa implementasyon sa ikaduhang tranche aron masiguro nga mahatagan og hustong benepisyo ang mga mamumuo sa rehiyon.
