Posibleng motestigo si kanhi Police Colonel Royina Garma sa hearing sa International Criminal Court (ICC) batok kang kanhi Presidente Rodrigo Duterte kalabot sa mga nahitabong pagpatay ubos sa ‘war on drugs.’
Mismo si kanhi Senador Antonio Trillanes IV ang mibutyag niini human nadawat niya ang impormasyon bahin sa posibleng pagtestigo ni Garma, nga iyang giingong kabahin sa mga unang mubulgar sa extrajudicial killings sa Pilipinas sa ICC.
Hisayran nga bisan pa wala pay klaro ang eksaktong unod sa iyang testimonya, kaniadto, mi-atubang si Garma sa usa ka komite sa Kamara de Representantes diin gihisgutan ang gitawag nga “Davao Model.”
Kini kuno nga sistema naghatag sa reward sa mga pulis nga makapatay sa mga nalambigit sa iligal nga droga.
Gibutyag ni Trillanes, gawas kang Garma, gilauman usab nga motestigo sa ICC ang ubang personalidad sama sa mga giingong kanhi hitman nga sila Edgar Matobato ug Arturo Lascañas, nga kaniadto na naghatag sa pamahayag bahin sa mga alegasyon sa EJK.
Padayon pang gihulat ang opisyal nga kumpirmasyon gikan sa ICC bahin sa mga saksi ug sa gilapdon sa ilang testimonya sa kaso.
