Mipagawas ang Department of Environment and Natural Resources (DENR) sa mando alang sa pag-pahunong sa operasyon sa tanang open ug controlled dumpsites sa tibuok Pilipinas aron malikayan ang posibleng kadaot sa kinaiyahan ug kahimsog sa katawhan tungod sa nagkagrabeng kainit sa panahon.
Base sa memorandum nga gipirmahan ni DENR OIC Assistant Secretary Jacqueline Caancan, gipahimangnoan ang tanang Environmental Management Bureau (EMB) regional offices nga tutukan ang implementasyon sa maong mando.
Gihatagan usab sa 15-ka adlaw nga ultimatum ang mga operator sa sanitary landfill aron mag-sumiter sa ilang contingency plan.
Subay niini, obligado usab ang DENR nga maghatag sa technical assistance sa mga lokal nga kagamhanan alang sa mas hapsay nga pagdumala sa solid waste.
