Posibleng motumaw ang krisis sa nagpadayong impeachment batok kang Vice President Sara Duterte kon magbangga ang desisyon sa Korte Suprema ug ang proseso sa impeachment court sa Senado.
Kini ang giingon ni Atty. Rhobert Maestre, IBP Board Member sa Misamis Oriental chapter, sa iyang interbyu sa Bombo Radyo.
Si Maestre miingon nga kung mugawas ang paborableng ruling sa Korte Suprema sa mga petisyon nga nagkuwestyon sa legalidad sa impeachment, mahimong maglibog kung unsa ang sundon sa duha ka sanga sa gobyerno.
Dugang pa niya, kon nakab-ot na sa impeachment court ang hurisdiksyon ug nagpadayon na ang proseso, posible kini mosangpot sa bangga tali sa hudikatura ug lehislatura.
Para kaniya, kini nga sitwasyon mahimong hinungdan sa kalibog sa implementasyon sa balaod ug sa pagdumala sa proseso sa impeachment.
Busa, gipasiugda ni Maestre ang panginahanglan sa klaro ug lig-on nga pagsunod sa balaod aron malikayan ang institutional crisis sa nasod.
