Gikondinar sa mayor sa Zaporizhzhia ang laing hugna sa pagpangatake sa tropa sa Russia gamit ang Russian Guided bomb.
Ning adlawa, misaka pa sa 12 ka lawas ang narekober sa gibombahan nga residential building, car service-repair ug car wash site sa syudad.
Namahayag si Regina Kharchenko, acting mayor sa Zaporizhzhia nga anaa pa sa 29 ka ihap sa mga ilang mga residente ang nadala sa hospital human maka-angkon sa mga samad sa managlahing bahin sa ilang lawas.
Nanawagan si Kharchenko sa gikinahanglang ayuda sa mga residente nga wala nay mabalikan nga puy-anan human naka-angkon sa tumang kadaut ang ilang nadamyos nga gambalay.
Sa pagkakaron, kapin libo na ang internally displaced (IDP) sa ilang syudad sukad sa bulan sa Enero 2026.
Una niini, masaligon gihapon ang ilang katawhan nga mahitabo na ang sensiro ug matinud-anon nga ceasefire sa Russia ug Ukraine ning tuiga.
