Gipanghimatuud sa Department of Justice (DOJ) nga wala pa sila makadawat sa impormasyon kabahin sa arrest warrant batok kang Senador Ronald “Bato” Dela Rosa nga gipagawas sa International Criminal Court (ICC).
Sumala ni DOJ Spokesperson Atty. Polo Martinez nga wala pa’y klarong kumpirmasyon niini ug bisan si Prosecutor General Richard Anthony Fadullon wala pa makadawat sa kaparehong report.
Base sa impormasyon, nadawat na daw sa International Police Organization (Interpol) ang warrant ug anaa na sa Pilipinas ang mga representante niini.
Gipaningkamotan usab sa DOJ nga hulaton ang desisyon sa Korte Suprema bahin sa mga petisyon sa legalidad sa pagpadala kang kanhing Presidente Rodrigo Duterte sa ICC ngadto sa The Hague, Netherlands, sa dili pa aksyunan ang giingong warrant batok kang Dela Rosa. (phillip ariata)
