Gikasubo ni Wilson Amad, usa ka IP Defender, ang pagka-postpone sa gitakdang dayalogo tali sa mga residente ug mga opisyal sa Barangay Mambuaya nga unta maghisgot sa kontrobersyal nga demolition sa kapin 300 ka kabalayan sa maong lugar.
Matud ni Amad, dako ang kasubo sa abogado ug mga kawani sa simbahan nga gitakdang mahimong tigpataliwala sa diskusyon tungod kay gipostpone ang maong panagtagbo bisan pa nga anaa na sila sa lugar nga pagahimuan sa pagpaminaw.
Dugang pa niya, importante unta ang dayalogo aron madungog ang mga kabalaka sa mga apektadong pamilya ug maklaro ang mga isyu nga may kalabotan sa ilang pagpuyo sa komunidad.
Tungod niini, giingon ni Amad nga nagpadayon ang kahadlok ug kabalaka sa mga residente, ilabina sa mga kabataan nga nakasinati og trauma tungod sa pagguba sa ilang mga panimalay, samtang nagpabilin ang kawalay kasiguraduhan kon ipadayon ba pag-usab ang demolition o dili.
