Nisang-at og reklamong cyber-libel ug perjury si Iloilo 1st District Representative Janette Garin batok sa 18 ka bodyguards ni kanhi Ako Bicol Party-list Representative Zaldy Co ug kang Atty. Levito Baligod ngadto sa Department of Justice gahapong adlawa.
Hugot nga gihimakak ni Garin ang mga alegasyon nga nakadawat siya og maleta nga puno sa kwarta gikan sa maong kampo. Matod sa kongresista, limpyo ang iyang konsensya ug walay bisan usa ka bag, sobre, o maleta ang nadawat niya, sa iyang pamilya, o sa iyang opisina.
Gipasabot usab niya nga iyang gihimo ang pagpasaka og kaso aron personal nga mapangutana ang mga akusado kon kanus-a ug asa nila gidala ang giingong maleta.
Hisayrang nga masaligon si Garin nga mapamatud-an nga bakak ang tanang pasangil batok kaniya tungod kay nasayod siya nga walay kamatuoran ang maong mga istorya. (riza budlao)
