Gikumpirma sa gobyerno sa Lebanon nga grabe ang kadaot sa mga UNESCO World Heritage sites sa Tyre ug sa mga karaang merkado sa Nabatieh human kini maigo sa mga operasyon militar sa Israel.
Gisaysay nga ang kadaot nahitabo atol sa mga pagpamomba ug ground operations nga gilusad sa Israel subay sa utlanan isip kabahin sa kampanya niini batok sa Hezbollah.
Matud sa Minister of Culture sa Lebanon, lisud pa mahibal-an ang tibuok gidak-on sa kadaot tungod kay aduna pay mga lugar nga dili maabot sa mga awtoridad kay sakop pa sa buffer zone nga kontrolado sa mga tropa sa Israel.
Sa laing bahin, gihimakak sa Israel nga tinuyo nilang gitarget ang mga heritage site ug gipasabot nga ang ilang mga operasyon nakatutok sa mga posisyon sa Hezbollah.
Nagpabilin nga dako ang kabalaka sa international community tungod sa padayon nga pagkadaot sa mga kultural ug makasaysayanong bahandi taliwala sa nagpadayong panagsangka. (jane abulag)
