Gipasigarbo ni Presidente Ferdinand Marcos Jr. nga padayon nga gipalapad sa PhilHealth ang mga benepisyo niini pinaagi sa YAKAP ug ‘Gamot Program’ aron mas daghang Pilipino ang makadawat og sayong pag-atiman sa panglawas ug libre o mas barato nga tambal.
Matod sa presidente nga ang mga miyembro sa PhilHealth mahimong makakuha og tambal gikan sa kapin 2,000 ka accredited providers nga adunay benepisyo nga hangtod ₱20,000 kada tuig.
Gipalapdan na sa PhilHealth ang coverage alang sa mga sakit sama sa kanser, sakit sa kasingkasing, HIV/AIDS, ug TB, lakip ang pagdoble sa therapy package ug pagdugang sa therapy sessions alang sa mga batang adunay developmental disabilities.
Misaka na sa kapin 7.5 milyon ka pamilya ang nakapahimulos sa benepisyo sa PhilHealth sa miaging tuig, samtang hapit 3 milyon ka pasyente usab ang wala na’y gibayran sa ilang pagpatambal pinaagi sa Zero Balance Billing sa mga ward sa mga ospital sa DOH.
