Gikompirmar ni Kagawad Eric Salcedo, Chairman sa Committee on Public Utility sa konseho, nga adunay gamay’ng kausaban ug kaayuhan sa dagan sa trapiko sa syudad sa Cagayan de Oro human gipatuman ang lig-ong pampublikong ordinansa sa transportasyon.
Taliwala sa nagkahapsay nga trapiko sa sentrong bahin sa syudad, gipadayag sa opisyal nga padayon nadawat gihapon sila sa mga nagkadaiyang reklamo ug mulo gikan sa mga pasahero ilabe nga magtutungha gikan sa probinsya ug dinhi sa syudad nag-eskwela.
Gipasabot ni Salcedo nga ang maong ordinansa gidisenyo pa kaniadto ubos sa Local Public Transport Route Plan o LPTRP ug sa panahon pa sa kanhi pamunoan ni Dongkoy Emano.
Tungod sa mga nitumaw nga suliran sa katawhan, padayon gitun-an sa komite ug sa Roads and Traffic Administration (RTA) ang mga reklamo aron makakita sa haom nga solusyon.
Tumong sa maong lakang nga makapangita og win-win solution nga makatabang sa mga commuter nga dili pod makadaot sa kadaghanan.
Gipaniguro sa kagawad nga padayon nilang bantayan ug giyahan ang implementasyon aron masiguro ang kaangayan alang sa tanang sector sa pampublikong transportasyon.
