Gitin-aw ni United Drivers Association (UNIDA) President Joel Gabatan nga suportado nila ang pagpatuman sa probisyon sa Local Public Transport Route Plan (LPTRP) apan, kinahanglan ipatuman ang Traffic Code of the City of Cagayan de Oro (Ordinance No. 10551-2007), nga naglimitar sa ruta nga agianan sa mga sakyanan gikan sa gawas nga lungsod.
Bisan pa man sa mga reklamo sa pipila ka pasahero tungod sa ‘double ride’ o dugang pletehan, gipamugos ni Gabatan nga gikinahanglan kining sakripisyo aron masulbad ang nagkagrabe nga trapiko sulod sa dakbayan.
Gipasabot usab niini nga angay lang nga sundon ang orihinal nga ordinansa niadtong 2007 nga nagmando nga kutob ra sa Westbound Terminal sa Bulua ang mga sakyanan gikan sa kasadpang bahin sa lalawigan.
Gikalipay sa grupo ang aktibong lakang sa panggamhanan nga ipatuman na gyud sa usa ka ruta ang mga sakyanan aron mahatagan sa patas nga oportunidad ang tanang sektor sa transportasyon.
Dugang pa ni Gabatan, nakalinya na usab ang mga plano nga pagtukod sa dugang nga mga terminal sa ubang strategic nga dapit sama sa Lumbia ug Puerto aron mas ma-ordenar ang dagan sa sakyanan.
Naghangyo ang lider sa transportasyon sa publiko sa dugang pailob samtang gihimo ang mas halapad nga solusyon alang sa hapsay nga trapiko sa syudad.
