Gipahayag ni House Prosecution Adviser Robert Ace Barbers nga nakapalig-on sa ilang mga alegasyon ubos sa Article 1 ang testimonya ni kanhi COA auditor Roderick Wamil isip saksi sa impeachment trial ni Vice President Sara Duterte.
Matod ni Barbers, miingon si Wamil nga unang higayon niya nga nasinati ang paggamit sa confidential funds sa Office of the Vice President sa panahon ni Vice President Sara Duterte, kumpara sa mga miaging bise presidente.
Gibutyag usab ni Wamil nga adunay mga kakulangan sa mga dokumentong gisumiter sa OVP ug DepEd alang sa liquidation sa confidential funds.
Matod niya, wala matuman sa OVP ug sa Office of the DepEd Secretary ang pipila ka gikinahanglang requirements sa pag-liquidate sa maong mga pondo.
Gipasabot usab ni Wamil nga adunay mga dokumentong wala motakdo sa katuyoan sa paggamit sa confidential funds, tungod kay adunay piho nga mga lagda ug requirements sa pag-liquidate niini.
