Gi-abi-abi sa Kremlin ang panawagan ni U.S. President Donald Trump kang Ukrainian President Volodymyr Zelenskyy nga hunongon sa Ukraine ang mga pag-atake sa mga pasilidad sa Russia nga naggama og diesel.
Matud ni Kremlin spokesman Dmitry Peskov, gisuportahan sa Russia ang panawagan nga undangon ang mga pag-atake sa mga sibilyan nga imprastraktura sa ekonomiya, samtang ang sunod-sunod nga pag-atake sa Ukraine sa mga refinery sa lana sa Russia nakaapekto sa produksiyon sa gasolina sa maong nasud.
Si Trump miingon nga ang mga pag-atake nakaamot sa kakulang sa diesel sa tibuok kalibotan, apan ang Ukraine naglantaw sa mga refinery sa Russia isip lehitimong target tungod sa gubat.
Matud usab ni Peskov, ang mas lapad nga kagubot sa merkado sa enerhiya sa kalibotan mas nalambigit sa panagbangi sa rehiyon sa Persian Gulf. (raniel mahunyag)
