Wala nay rason ang mga konsehal nga dili makapanday og mga lokal nga ordinansa ug resolusyon karon nga gilusad na ang e-Legis program alang sa kapin usa ka libo ug unom ka gatos ka mga LGU sa tibuok nasud!
Mao kini ang gihingusgan ni Vice Mayors’ League of the Philippines National President Vice Mayor Maynard Francis Bumanglag diin iyang gipasabot nga eksklusibo unang gihatag ang access sa maong sistema ngadto sa mga bise mayor, konsehal, ug SP secretary.
Matud ni Bumanglag, tuyo niini nga masiguro nga matuman sa mga magbabalaod ang ilang mandato ubos sa balaod ug mahatagan ang mga opisyal og giya subay sa standard sa University of the Philippines.
Gipahibalo usab sa opisyal nga giplanohan nang isumpay ang e-Legis ngadto sa eGov.ph platform samtang giklaro niya nga alang sa mga ordinaryong lungsoranon nga buot mangayo og kopya sa ordinansa, moagi gihapon sila sa naandan nga pagtugot gikan sa buhatan sa bise mayor.
