Makalaum ang mga motorista sa Pilipinas og laing hugna sa pagkunhod sa presyo sa mga produktong petrolyo sa ikatulong semana sa Nobyembre 2026, diin gibanabana nga mous-os og ₱4 hangtud ₱5 matag litro ang diesel ug ₱3 hangtud ₱4 matag litro ang gasolina.
Sumala kang Jetti Petroleum President Leo Bellas, gibase ang maong banabana sa lihok sa presyo sa lana sa internasyonal nga merkado ug sa pag-usab sa bili sa piso batok sa dolyar hangtud Huwebes, Nobyembre 12, apan wala pa maapil niini ang sinemana nga kausaban sa gasto sa transportasyon sa lana pinaagi sa dagat ug insurance.
Sa sinugdanan sa semana, mikunhod ang presyo sa lana sa internasyonal nga merkado tungod sa paglaum nga mahimong mouswag ang panaghisgot sa diplomasya tali sa Estados Unidos ug Iran, nga nakapahupay sa kabalaka bahin sa posibleng pagkabalda sa suplay sa lana.
Apan, misaka pag-usab ang presyo tungod sa nagkadakong kabalaka sa posibleng pagkabalda sa suplay human sa mga pag-atake sa imprastraktura sa enerhiya sa Saudi Arabia ug sa mga barko nga nagbiyahe agi sa Strait of Hormuz. (raniel mahunyag)
