Gipahibalo ni Department of Foreign Affairs (DFA) Assistant Secretary ug ASEAN 2026 Spokesperson Dominic Xavier Imperial nga andam na ang Pilipinas sa pag-host sa ika-49 nga ASEAN Summit ug sa mga dunay kalabotang panagtigom nga ipahigayon gikan Nobyembre 15 hangtud 17, ning tuiga.
Matud ni Imperial, pangulohan ni Foreign Affairs Secretary Maria Theresa Lazaro ang miting sa mga Foreign Ministers sa ASEAN sa Nobyembre 14 alang sa ilang katapusang panagtigom karong tuiga, diin hisgotan ang pagrepaso ug pagpatuman sa Five-Point Consensus alang sa Myanmar, ang pagsagop sa concept note ug terms of reference alang sa planong pagtukod sa ASEAN Maritime Center, ug ang isyu sa transboundary haze sa rehiyon.
Dugang pa sa tigpamaba, ipahigayon usab ang ika-32 nga ASEAN Political-Security Community Council Meeting aron hisgotan ang mga isyung dunay kalabutan sa seguridad ug politika sa rehiyon.
Dugtong niini, pangulohan usab ni Lazaro ang ika-39 nga ASEAN Coordinating Council Meeting, diin repasohon ang mga taho gikan sa tulo ka haligi sa ASEAN Community ug ang mga pagpangandam alang sa umaabot nga summit. (raniel mahunyag)
