Gikondena sa Muslim World League (MWL) ang gihimong pag-atake sa Israel sa Nasser Medical Complex sa Khan Younis, habagatang bahin sa Gaza Strip, tungod sa pagkamatay sa unom ka tawo, lakip ang mga medical worker, pasyente ug mga kauban niini.
Kapin sa 20 ka tawo ang nasamdan sa maong pag-atake, nga nahitabo sa surgical building sa ospital niadtong Huwebes, Nobyembre 12, 2026.
Sa opisyal nga pahayag nga gipagawas sa MWL, hugot usab nga gikondena sa organisasyon ang padayong pag-atake sa mga tolda ug uban pang mga dapit nga kapuy-an sa mga nabakwit nga Palestinian, ingon man ang mga restriksiyon sa pagsulod sa humanitarian aid, mga materyales alang sa kapuy-an ug mga suplay medikal ngadto sa Gaza.
Matud ni MWL Secretary-General Sheikh Dr. Mohammed bin Abdulkarim Al-Issa, dili madawat ang maong mga kalapasan kay nagpasamot kini sa krisis sa humanitarian sa Gaza, naglapas sa internasyonal ug humanitarian nga mga balaod, ug nagbabag sa mga paningkamot alang sa kalinaw.
Giawhag usab niya ang internasyonal nga komunidad nga tumanon ang moral ug legal nga responsibilidad niini aron masiguro ang diha-diha nga pagtapos sa mga kalapasan batok sa katawhan sa Palestine. (raniel mahunyag)
