Gi-flag sa DOE ang 114 ka gasoline stations nga wala motuman sa gimando nga rollback sa presyo ng gasolina. Posibleng silot nagpaabot. Basaha ang detalye!

Gi-flag sa Department of Energy (DOE) ang 114 ka estasyon sa gasolina sa nagkalainlaing bahin sa nasud tungod sa kapakyasan sa hingpit nga pagpatuman sa gimando nga pagpaubos sa presyo sa lana human sa inspeksiyon nga gihimo sa Oil Industry Management Bureau (OIMB) gikan Nobyembre 10 hangtud 13, 2026.

Matud ni OIMB Director Rino Abad, 213 ka estasyon ang giinspeksiyon ug 114 niini ang napakyas sa hingpit nga pagpatuman sa ₱16.80 nga rollback matag litro sa gasolina, diin ang pipila kanila mikunhod lamang og ₱10 o ₱12 matag litro.

Gipasabot sa pipila ka retailer nga nakapalit sila og mga produkto sa petrolyo gikan sa ilang mga supplier sa mas taas nga presyo sa wala pa ipatuman ang rollback, apan giendorso sa DOE ngadto sa Legal Department ang mga resulta sa inspeksiyon nga naglambigit sa 97 ka estasyon niadtong Nobyembre 13 alang sa pagtimbang-timbang ug tukmang aksiyon.

Gitan-aw usab sa ahensiya ang posibleng mga paglapas sa Oil Deregulation Act ug Presidential Decree No. 1865, diin ang mga mapamatud-ang nakalapas kay mahimong mag-atubang og mga silot nga kriminal ug administratibo, lakip ang pagkabilanggo, multa, ug pagsuspenso o pagbawi sa ilang mga permit. (raniel mahunyag)