Wala na matingala ang progresibong grupo nga August Twenty One Movement sa gihimong pagtabon sa mga kabus nga lugar sa Metro Manila nga agian sa mga langyawng lider alang sa ASEAN Summit.
Namahayag si Volt Bohol sa pundok sa ATOM nga susama ra kini sa naandang buhat kaniadto ni kanhi First Lady Imelda Marcos atol sa panahon sa diktadurya aron itago ang tinuod nga kahimtang sa kapobrehon sa nasud.
Gipadayag ni Bohol nga bisan og tabunan pa sa administrasyon ni Presidente Ferdinand Marcos Junior ang maong mga komunidad aron makadani og mga langyawng negosyante, dili gihapon mosalig ang mga investor tungod sa kasaysayan sa pangalan sa ilang pamilya.
Gidugang sa lider sa grupo nga usa ka pagpamakak sa katawhan ang pagpakaaron ingnon atubangan sa mga bisitang lider sama ni United States President Donald Trump imbes nga sulbaron ang tinuod nga problema sa nasud.








